eer ich aber weg geen. wil ich mein laster rainigen. Vnd mit solchen
worten zcog er das schwert. vnd hieb konig Dittrich mit einer grossen
wůnden dernidderr. Derhalbenn er aůff der Stet, vonn des konigs
dienern wart erstochenn. Vnd der konig lies aůs schmertzenn
vonn entpfangner wůnden sein Swester mit ÿrn kindernn toten.

Darnach gab konig dittrich den Sachssenn der Důring Lanndt zů erbeÿgen
Derhalbenn die Sachssen die Stat Schidingen. vnd das ganntz Lanndt
Důringen einnamen. vnd die Důringen zwischen den hartz vnnd die
Lewben trÿben. Da sie aůch noch wonenn. Vnd als etlich Cronicka
meldenn. alle die Graůen in Důringen der wapen der lewe. ist mit dem
krůmmen hals. sein mit den Důringen aůs Sachssen Vertriebenn.