Dadiser Lanntgraff Rochlitz eingenůmmen hett. wůrd ÿm eyns
angetzaigt, wie der Graff vonn Nassaw des Romischenn konigs
Vetter, gein Oschatz wůrd reÿtenn. Darůmb versammelt er
sich mit seinem Brůder Tÿtzmann so starck er vermocht, vnnd
hilt ÿm fůr hinder den Bůchssen. vnd fingn ÿn mit zweintzig,
Edelman. fůrenten ÿn gein Rochlitz vnd setztenn ÿn gefencklich.
mit den seinen. Vnd schatztn ÿm ab das Sloss Lichtennwaldt,
mit den Steten. Dobelÿn. Geÿten. vnnd Bornn. Aber liessenn
Ÿn dennoch nicht ledig. dess aůsgangs also zůerharren. In dem
wart des gefangenn Graůen vonn Nassaw Vetter, der Romisch
konig Adolff vonn Hertzog Albrecht erschlagenn.