Darnach zcog diser Lanntgraff fůr die vberige Stete. Leÿptzick.
Freÿberg. Meÿssenn Oschatz vnnd andere. die sich alle williglich gabenn.
Vnd ÿm hinfůr an getrew zůsein swůrnn. Die er aůch gůtlich aůffnam. vnd
bracht mit gotlicher hÿlff sein Veterlich Erbe alles wider zůwegenn.
An etlich Graůen vnnd herren wie In nachfolgenden vnterschaidenn
vermelt wirth.

Da der Romisch konig Adolff erschlagenn was. vnnd hertzog Albrecht von
Osterreich Romischer konig wordenn. kamen die vonn Eÿsennach mit sambt
dem Lanntgraůen Albrecht zů ÿm. vnnd beclagten sich wie das die Jůnge
Lanntgraůen des Lands zů Důringn sich vnnter zůgen. Vnangesehen
das es vonn dem Romischen konig Adolff vmb sein geldt gekawfft wer,
Derhalbenn es billich an das Raich fiell Aber vber das hetten
sie Wartbůrg betriglichenn gewůnnen daraůs sie der Stat Eÿsennach