schicket er den Graüen vonn Weÿlnaw zů einem hawbtman widerr
Lanntgraff Fridrich mit vil Folcks Inn Důringn, Vnnd trawet baldt
mit macht hinnach zůkůmmen. Er schreib aůch den von Erffůrdt
Můhlhawsenn. Northawsen. den von Eysennach vnd ÿrem hawbtman.
behilfflich zůsein Wartpůrg wider zůgewÿnnen Derhalbenn der
kongisch hawbtman den Berg die Eysennachenbůrg hinter Wartpůrg
gelegenn einnam. vnd schlůg aůff dem Berg ein BergFrid aůff. mit eÿnem
steÿnen Fůs einer gleůen hoch. Vnnd hett da ein kůchenn. Also kamen
die vonn Eysennach zů ÿm vnd hieben ein bleÿden stat In den steÿn.
zwischenn der Eÿsennacherbůrg vnd Vÿhbůrg da sie grosse steÿn tag vnd
nacht. teglich Inn Wartpůrg worffen. vnd doch wenig schadens thetenn.
vnd hettenn die andern kůchen.

Die vonn Erffůrdt legtenn sich hinter die vonn Eÿsennach
gegen dem Růdolffsbornn. Die hieltenn die drit kůchenn.

Die vonn Můlhawsenn legtn sich vorn an den Berg nahendt beÿ des konigs
Berg Frid Vnd hetten die Vierten kůchen.

Die von Northawsenn lagertn sich mit ÿrem Folck gegen Sant Egidien
Clawsenn. Vnd hieltenn die Fůnfft kůchenn. Diss
findt man noch hewtiges tags war zeichenn aůff Vilbenantem Berg,
Wann Fůnff keller steenn da in Berg gehawen. ein ÿtzlicher an seiner
genantn Stat.

Die Bůrger vonn Eysennach warnn stets in dem hagenn da Sannt.
Elisabet Closterlenn leÿdt, vnd Lanntgraff Fridrich war mit
seiner stieffmůter vnd Frawen dieweil zů Wartbůrg.

Die kongischenn vnd ander gedacht Folck trachtenn mit grossenn
vleÿs das Sloss Wartpůrg zůstůrmen vnd zůgewÿnnen. Theten
aber dem Lanntgraff auff allen ÿrenn hochsten vleÿs nicht mer schadens
dann das sie mit bleÿden gein Wartpůrg einwarffenn. vnd mit der
hůte werten das er seÿn Sloss nicht mocht speÿssenn.