kam zů ÿm mit eÿnem grossenn Folck. Aůch sein Brůder Lanntgraff
Tÿtzman aůs dem Osterlanndt. Vnnd die Graůen von Swartzbůrg,
vonn Bichlingn, von Honsteÿn. vonn Stolberg. vnnd von Qůernforth.
vnnd die andern Edeln. von helldrůngn. Vonn Varÿla. vonn Dreforth.
von Slatheÿm. vonn Ebenleyben. vnd vonn Vaner. vnd vil gůter herren
Ritter vnd knecht kamen zůsammen. zů Sonnenborn. vnd brachten vil
wagen mit speÿs zůsammen. Da man zů Eÿsennach nicht daůon
wůste. vnnd růcktenn mit dem tag vor Eÿsennach vnd speisten wartbůrck
mit gewalt vnd kamen. mit den wagen aůs dem Sengelbach. vnd fůrn
da itzůndt die Carthewser ligen, vnnd kamen die Frawenbůrg an. An
der Frawenbůrg vnnd aůff den Santwerff zwischenn Wartbůrg
vnnd Eÿsennach. da hieldenn die weil Dreÿhůndert vnnd sechsvnddreisig
man mit gekronten helmen. gůte Ritter vnnd Edellewth an die beÿ den
wagenn rÿeten, vnnd lieffenn. mit gůtem geschůtz. Vnd warn vor allen
thůrm zu Eysennach das nÿmants torst heraůswandern. Aůch dorsten
die aůff der Eÿsennacherbůrg nicht herab kůmmen. Můstn sich
aůch darzů vberfals beforchtn.

Darnach begab es sich in dem wÿnter da Wartbůrg wol gespeÿst vnd besetzt was.