Als nůn Marggraff Ditzman. welcher aůch Lantgraff zů Důringenn was.
gestorbenn was. kam die landtschafft von Lantsberg. Meÿssen.
Osterlandt vnnd Důringn. vnd alle die. aůs disen landen Lanntgraff
Fridrich woltn gehorsam vnd trew. als ÿrem rechtenn Erbherren laÿsten.
aůff sein schrifftlich fordrůng zů ÿm gegen Erffůrdt. vnd gelobten
vnnd hůldten ÿm da aůff Sant Petersberg. vnd hielden ÿn fůr ÿrn
rechtenn erben. willig leÿb. gůt. vnnd lebenn beÿ ÿm zůlassenn.
Darůmb loset er sie da alle aůs den herberigen. Gab aůch ÿrn
viln geldt. pferd. vnd claÿnat, mit angeheffter trostůng. beÿ ÿn zůthůn,
als eÿnem frůmmen herren zimbt. Vnd sie. wenn sie
von dem Romischen konig mit krieg beschwert wůrdenn. zůretten vnd
zubeschůtzen. vnd beÿ ÿn verderbenn ader genesenn.