Darnach zcogenn Lantgraff Fridrichs lewth wider anheÿm vnd warn ser
vnwillig wider die Graůen vonn keffernberg. Mulberg. vnd die von
Eÿsennach, vnnd etliche andere Stete. die es mit Lantgraff Albrecht hielden
vnnd ÿrem herren Lantgraff Fridrich bisher nicht hetten gehůldet.
nach wolten hůldenn. vnd zcogen aůff dieselbenn vnd alle andere
die Inn ÿrem verteÿding vnd verbůntnÿs nicht warn. vnd beschedigtn sie
mit brant vnd nam. Derhalben stets newe clag an den Romischenn
konig von den beschedigtn raichtn. Da der Romisch konig
Albrecht erfůr das die seinen ser von den Důringischen herren. vnd von
Lanntgraff Fridrich vnterdrůckt vnd teglich beschedigt worden In dem
Landt zů důringn. versammelt er Nach Cristi gebůrt Dreÿzehenhůndert
vnd Im Sÿbenden Ihar ein gros heer mit dem Graůen von Nortinberg.
vnd fertiget sie aůff den Lantgraff Fridrich in das OsterLanndt.