Jn melchem [lies: welchem] heer warnn Osterreicher Behemen. Swabenn. Baÿrn
vnnd allerleÿ Folck, Vnnd vermeintn die dreÿ Landt. Meÿssen
Osterlandt vnnd Důringn zůůerheren. vnd zůgewÿnnen. Als das derr
Lanntgraff vernam. růstet er sich mit den seinen In Meÿssen aůffs
sterckst so er vermocht. Bat aůch den Hertzogen vonn Braůnsweig ÿm zů
zeziehenn mit Folck Welcher ÿm schicket Dreÿhůndert
gůter mann reůtter vnd knecht. Er gebot aůch den Graůenn In
Důringen bey ÿm zůerscheÿnenn. Die aůch aůffs sterckst zů ÿm kamen.
mitsambt den aůs dem OsterLandt. vnnd trafen aůs des Romischn konigs
beÿ dem Stetlenn Lůcka. Also schicket der Lanntgraff sein Folck zům
streit. Derhalbenn die Osterlender Vnd Důringe den Ersten streit theten.
vnnd dem Romischen konig vnmassen vil Folcks erslůgenn. Nach disem
streit kamen die Meÿsner wol gerweth. Da wart der Streit also hefftig
vnnd gros das die Swabenn die totenn Ross aůfschnitten. Vnd warffen das
eÿngeweid aůs. vnnd krochen in die pferd. Darnach kamen die
Sachssenn. Also hies der Lanntgraff das Folck gefangn zůnemenn.
sůnderlich die Edellewth Darůmb namen sie die selbenn gefangen.
Dreÿhůndert vnnd Sechtzick man. es wůrden aůch tawsent vnnd
Vierhůndert man erslagenn. Die andern kamen schwerlich daůon. Dise
schlacht ist gescheenn Im anheben des Brachmonds an Sant Petronellen
tag. Darůon kam das Sprichwort. Es geet dir als den Swaben. vor
Lůcka.

Mann findet aůch das der Romisch konig hab mit disem seinem heer
Inn das OsterLanndt geschickt als ein hawbtman den Graůen von
Nortenberg. mit verhencknÿs viler Graůenn. vnd herren die ÿm so
baldt er kam wider ÿr aÿgenn herrenn zů hilff zcogen. heimlich vnnd
offentlich. Also sein sie getzogenn gein Pegaw. darInnen sie speÿs
besteltenn. vnd verherten das Stetlen. aůch lebsůs. vnnd Rotaw. mit
vil andernn. Vnnd da sie das ganntz Landt verhert hetten. legtenn
sie sich fůr das Stetlen Lůckaw. Da sie vil vbels teten Frawen vnnd
JůnckFrawen schendtn. vnd Got vnd sein hailigenn lestertenn.
Deshalb sie von dem Almechtigenn zeitlich wie oben vermelt
gestrafft wůrdenn. Daraůff sich der Lanntgraff mit seinen
Graůen. Rittern Bůrgern vnnd Bawrn zů Leÿptzick versammelt. vnd
da gar ein erliche mess bestalt zůsingn. Sich vnnd ÿren streÿt
Got zubefelnn. Etlich schreibenn der lantgraff hab gesagt.
da er sich angethan hab. Es ist besser Inn dem streit zůsterbenn. Dann das
vbel vnnsers Folcks zůsehenn. Gib her den helm dreÿer Landt ich sie.
ader sie mich zůůerlassenn. nach Gotes willenn. der vns Hellff soůil
wir gerechtickait habenn. Also seÿ er aůsgezcogenn. vnnd hab den Sÿg
gewůnnen. Vnd die Swaben vnnd andere also verJaget. das sie aůff
den Hewtigenn tag sein nicht widerkůmmen darnach seÿ der Lantgraff
wider gein leiptzick getzogen. Got vmb solche grosse gnad dancksaget.