aůs dem Lanndt zů Důringn ziehenn. er hett ÿm dann sein gefangen
widerlos gegebenn. Darůmb bracht der Lantgraff all sein
Lanntschafft in Meÿssen. Im OsterLandt. vnd Inn Důringenn
Aůch sein Swager den hertzog vonn Braůnsweig mit sambt den
Sachssenn aůff. vnnd kam aber zů streit wider den Romischen konig.
Vnnd Sprach zů dem knecht der ÿm den helm aůffbant, Bindt hewt
aúff dreÿ Landt ader gar keins. Vnnd streit frolich mit dem Romischn
konig Also gewan des Lantgraůen Folck baldt den Sÿg. Vnnd der
Romisch konig wart flůchtig. Vnnd zcog wider Heÿm.

Vnnter wegenn begegent dem Romischen konig Albrecht der Hertzog von
Baÿrnn. Welcher dem Lanntgraůen wolt zůziehen mit grossem Folck,
vnd streÿt mit dem Romischn konig. fieng ÿm vil Lewth ab.
vnd der Romisch konig entflog kaůmet gein Nůrmbergk eÿn.