ym mer Folcks keme. vnnd soltenn vber ein wasserr gnant die Rütze
fahrn. Als nůn der konig zů gestat kůmmen was. besorget er keins
argens. In dem trat seins bruder Sůn Johannes zů ym. Vnd schůlt
ÿn. vnnd bot ÿm vil schentlicher wort. Růcket aůch sein schwert aús.
vnnd hieb den Romischen konig in den kopff, vnnd ain Or vnd awg
hinweg. vnd den wangen. Die andern seines brůder Sůn diener
hetten ÿnn vmbringet. vnnd stachenn mit schwertn Inn ÿn. Das er
da zůstúndt tot blÿb. Des Romischen konigs diener die noch nicht
vbergefarn warn. kuntn ÿrem herren nicht gehelffen. Aůch die
herren die mit ÿm woltenn vbergefarn sein. Der morder entwart
zůstůndt Inn ein Vest Sloss zů Osterreich gehorig. Als das
die konigÿnn erfůr lies sie důrch die yrenn etliche Sloss einnemen.
den Jhenen. die an yres Herren tot schůldig warnn. vnd lies sie
enthawbtenn Aber Vrsach dises totslags erwůchs nach gemeÿnem
gerůcht Inn Osterreich daraůs Diser Romischer konig
Albrecht hett ein brůder. Welcher das Hertzogthůmb zů Osterreich
halb hett. vnnd nach dem er zeitlich starb. lies er benantenn Sůn
Johannsen ein kleÿn kÿndt. Den zcog der Romisch konig gar nerlich
an seinem hoff. Als er nůn sein mennliche Jhar erraicht. bat
er den Romischen konig seinen Vettern das er ÿm sein Veterlich erb
wolt lassenn folgenn. Damit er wůst. warzů er sich halten solt.
Aber der konig das an alle billickait vnnd zcimůng vnangesehen.
verzcog ÿm die sach lange zeit. Derhalbenn schicker [lies: schicket] der Iůng
hertzog vonn Osterreich vil fůrstn vnnd herrenn an konig fůr ÿn
zů bitenn. auff das ÿm sein Erbtail mocht werden. welchen
der Romisch konig antwort, er wolt es gern thůn. Er lies
ÿm aber keÿn gebrechen. Sůndern thet ÿm als gůtlich. als ÿm selbst
mit essen. trinckenn. claÿdern. harnasch pferden vnnd allem andern Aber
der Romisch konig Vertzog er so lang das nichts aůs der sachenn wart.
Inn mitler zeit hielt sich der Romisch konig zů dem gantzen Landt
zů Osterreich Vnnd nam eÿn das geschess vnnd alle anderr
pflicht, herschet allein. vnd gab seinem Vettern gar nichts darůon
Derwegen aůch der Jůng herr wart also verachtet. das ÿn nimants fůr
ein hertzogenn. ader fůr einen Fůrstn hielt. Das verdros den
Jůngen hertzogenn ser. Darůmb ermordet er entlich
seinen Vettern den Romischen konig. sein Veterlich Erb damit,
Weÿl er nicht anders mocht dasselb vnbehindert zůerlangenn.