Nit lanng darnach erfůrn die vonn Eÿsennach das der Romisch konig
Albrecht vonn seinem vetern hertzog Johansen vonn Osterreich ermordt
was. Vnnd erschrackenn desselben fals vbermessig ser. Derhalben sie
aůch die vonn Franckensteÿn. vnd alle Erbare lewth zů den sie sich
gůts versahen. vmb freůntlichen rath vleÿssig ansůchtn. wie sie sich
weiter vnnd hinfůr soltenn halden. dÿweil sie důrch des Romischen
konigs tot. einer grossenn hoffnůng entsatzt wern. Also wart den
vonn Eÿsennach geratn. das sie soltenn mit ÿrem herrenn dem Lantgraff
Fridrich ein freůntlichen tag laistn. Vnd ÿn biten das er gegen Eÿsennach
wolt zů ÿn kůmmen. vnd sein beste mann mit ÿm bringn Da
woltenn sie aůch zůkůmmen. Vnnd was sie alda von seinen Graůen
vnnd ÿren freůnden vnterweist vnnd geheÿssen wůrden. wolten sie
thůn vnd lassenn. was sie also mit Eren vnd recht. mochtn vnd soltn
thůn. Daraůff Lantgraff Fridrich vmb Sant Marie Magdalene tag mit seinen
Graůen gein Eÿsennach kam. Vnnd rÿeth gein Wartbůrg Also kamen