Er zcog aůch gegenn Meÿssenn. nam eÿn Aldenbůrg. kemnitz. zwickaw.
vnnd die andern Slos vnnd Stete. zů dem Lanndt zů Pleÿssenn gehorendt.
Welche Stete nach antzaigůng etlicher Cronickenn etwan Raichstete sein
gewesenn vnnd genant worden. Vnnd villeicht darůmb das sie die zwen
Romische konige. Adolff vonn Nassaw, vnnd Albrecht vonn osterreich.
vermeinten als dem Romischenn Raich zůgehorick. zuhabenn. Welch
Lanndt pleÿssenn des Raichs was. vor die koste vnnd schedenn die Lantgraff
Fridrich hett erliden von konig Adolff, vnnd konig Albrecht vmb das Landt
zů Důringn. Welchs dieselben konig als zů dem Romischenn Raich
gekaůfft, vermeinten zůhabenn.

Es schreibenn aůch etliche das die zeit. Leÿptzick. Grÿmme. Torgaw.
Haÿne. kemnitz. vnnd zwickaw. vnnd etliche andere Stete sein Raichs
Stete gewesenn. vnnd dem Romischenn Raich zůgehorig. mitsambt etlichn
schlossernn. Vnd nachdem sie kaÿnn schůtz mer habenn gehabt. habenn
sie sich diesem Lanntgraůen Fridrich dem fraidigen gegebenn.

Nach solcher einnemůng gedachter Lanndt. gab Lantgraff Fridrich alle sein