Franckraich vnnd in Teutzschen Landenn konig was. aůsgenůmmen das
Lanndt zú Sachssen. Der selbig konig Als man in Frantzosischen Cronicken
findt. ist ein Fridsamer Fůrst gewest. Vnnd hat in Franckraich zů Parÿs
Sannt Dionisÿ Můnster gebawet. Inn Elsas dise múnster. Wintzbůrg
Morbach. vnnd Sels. Jn Důringen bede Merwigesbůrg. Nemlich eÿne da
itzůnt Sannt Dionisÿ kirchenn. die er lies in ere des hailigen Apostell
Fůrstenn Sant Peters weÿhen. Da er aůch nach anweisůng des einsidels
Trůtman ein versamlůng der Můnche Sant Benedict ordens hin stifftet Welchs
aůch konig Dagobert der Iůnger bestetigt hat. vnd sein můterlich erb
darzů gegebenn. Dann sein můter was konig Bertars vonn
důringen tochterr. vnnd hies Radegůnda.

Diser konig Dagobert hat aůch das Stetlen beÿ Erffůrdt, als es in derr
Frantzosischen Cronicka genant wirt. Ader das Schlos nach antzaigůng
der důring Cronicka genant Dagoberstat von seinem namen. oder als
man itzůndt redt Daberstet gebawet. Wiewol man aůch findt das
das die wenden habenn Dagobertstat gebawet. Aůch helt die
Důrnigsch [lies: Důringisch] Cronicka also. er hab das Schlos zů Erffůrdt. aůff Sannt
Petersberg die zeit gelegenn. eingebrochen. vnd ein Closter daraůs gemacht.
Nach cristi gebůrt Sechshůndert vnnd Im Sÿbenvnndzweintzigstenn Jarr.

Der důring Cronicka helt aůch das nach abgang konigs Dagoberts. konig
Clodoneůs vnnd vil anndere konige mer In Franckraich alle Teůtzsche
Nacion. aůsgenůmmen Sachssen. bis aůff konig Pipin des grossenn kaÿser
karls Vater. regirt haben. Welchs etlichenn gar
glawbwirdigenn schrifften gar entgegen ist. Die da haldenn das
konig Pipin kaÿser karls des grossenn Vater seÿ der Erst konig in
Franckraich gewesenn.