Als der Lantgraff erfůr das die vonn Erffůrdt so grosse důrstickait
an ÿm. vnd den seinen hettenn begangn. fordert er die vonn Erffůrdt
an das Landtgericht zů Mittelhawsen In maÿnůng sie vmb begangn groben
pewrischenn freůel. mit vrtailn vnnd rechtlicher ordnůng In des
Romischen Raichs acht zůbringn. Als solchs die von Erffůrdt verstendigt
warn. liessenn sie von allen Priestern gaistlichen vnd schůlern
ein herliche procession machen. Sie vor die Stat zůgleitenn.
mit gesang vnd gebet. Damit sie vonn dem Almechtigenn behůt, mochtenn
vnůersert wider kůmmen. Also giengenn sie solcher processen gewapent
nach mit ÿrem Panÿr, vnnd mit gantzer macht Vnd kamen an
das gericht zů Mittelhawsenn So starck das Landtgraff Fridrich
mitsambt den seinenn von dannen weichen můst vnnd rawmenn.