Zum andern mal fordert diser Lanntgraff die von Erffürdt aber
fůr das gericht zu mittelhawsenn. hett auch seinen Graůenn
Erbarn manschafft, vnd andern vnterthanen gebotenn alda zůerscheÿnenn
Also kamenn die vonn Erffůrdt abermals, zogenn aber
ane procession frolichen aůs. Da das der Lanntgraff vernam.
gebot er allen seinen mannen. beÿ dem hals. das nÿmants solt eÿn
schwert gegen ÿn zciehenn. Sůndern man solt sie mit knůtteln beratn.
vnd mit zaůnstecken schlagenn. vnnd mit ÿrn rossenn treten.
Also wůrden die vonn Erffůrt aůff der selbenn fart mit knůtteln
wolgeslagen. Vnd vnter die pferd getrett, Vnnd also das sie
flůchtig wůrden. Vnd Inn ÿr Stat grabenn flohen