Vonn des vnnd anders wegen trachten die von Erffůrt wie das sie mochtn
dem Lantgraůen widersteenn. vnd schicktn nach Graff Herman von
Weÿmar. welcher ser reich vnnd mechtig. Aůch hochmůtig gnůg was.
vnd nÿe mit den Jůngn Lantgraůen gehalten. In ÿren gedachtn kriegen.
Sůndern wendet all sein gemůt daraůff das er der best vnd fůrnemste
were. vnnter allen Graůen vnnd herren Inn Důringn Mit
disem verbůnden sich die vonn Erffůrdt, die von Northawsen. die von
Můlhawsen aůch. Welchen Lantgraff Fridrich nicht ser
genaigt vnd gnedig was. Dann sie hettenn ÿm In dem kongischen
krieg vil verdries vnd vbels ertzaigt. Dise dreÿ Stete namenn
soldener aůff, vil gůter lewth aůs Francken. hessen. Bůchen. vnd von dem
Eÿchsfeldt. vnd theten grossen schaden mit rawben vnd brennen Im
Lanndt zů Důringn.