Die von Erffůrdt zcogenn abermals aůs. vnnd liessen sich die
Priesterschafft geleÿten. vor die Stat. vnnd legtenn sich vor Vttenstet.
Schickten aůch nach dem benantn Graůen vonn Weÿmar. Vnnd nach
den von Mulhawsenn vnd Northawsen. vnd lagen daůor mit ÿrem geschůtz.
vnnd ander gewalt Fůnff tag. Stůrmtn es stetiglich vnd gewomen [lies: gewonnen]
es. vnd die daraůff warn. dingtn leib vnd leben aůs. das sie
Vttenstedt. nicht lenger mochtn erretten. ÿn aůch nÿmants zů
Rettůng kam. Darůmb wart Vttenstedt aůsgebrant vnd zů grůndt
verderbet. Also woltn die von Můlhawsen vor etliche mer der Edellewt slosser
ziehen Aber der Graf von weÿmar wolt nicht folgen von wegen der
vnkost die er nicht daraůff wolt wenden. Derhalben die von Erffůrdt
besorgtn. sie mochten zůfern von der Stat kommen. vnd das ÿn ichts
vnleidlichs Im heÿm zcog mocht begegen. wie vor Mittelhawsen gescheen.
Demnach zcogen sie wider mit ÿrem Folck heÿm. desgleichen aůch ÿr gedachte
Půndtgenossenn.