Nach Cristi gebůrt Dreÿzehenhůndert vnd Im zcehenden Jhar zogen die
vonn Erffůrdt, mitsambt den von Northawsen vnnd Můlhawsenn.
Aůch dem Graůen von Weÿmar aber mit gewalt aůs. vnd teten vil schadens
Im Lanndt mit brant vnd rawb. Schonten aůch wider der hailigenn tag
nach der Gotshewser. Sie schindtn die kirchen vnd verschonten nÿmants
wider aůswendig nach Inwendig In Irer aÿgen Stat Wann sie legtn
in der Thůmherrenn vnd ander Priester behawsůng ÿr soldener.

Darůmb schicket es der Almechtig also. das sie an dem achten tag der
hÿmmelfart Cristi des Lantgraůen etlich man ankamen. Welche
Lantgrefische mer dann Sÿbentzig man den von Erffůrdt abfingen.
Aůch der vonn Erffůrdt hawbtman. genant Ludwig vonn Gůttirn.
gewůnnen aůch den von Erffůrdt mer dann hůndert reÿsige pferd ab.
Darůmb lies der Lantgraff Der vonn Erffůrdt benantn hawbtman
Im gefencknÿs hůngers sterben. Vnnd die andern schatztenn sich.