Aber nichts desterweniger beschwerten die vonn Erffůrdt ÿr
Priesterschafft vnnd gaistlickait. Sůndern legten mit gewalt ÿr
soldener In Sant Peters Closter, Vnd Inn eÿnes Thůmherren Hoff
genant vonn Molslewben, aůch ains vonn Ebelewbenn. Liessen ÿn aůch
mit gewalt nemen was sie hetten. ÿrn freůnden als ÿrm gegentail
zů widerr. Sie legtn aůch ÿre soldener in das Closter zům Newenwerck Welchs
sie můst mit kost vnnd fůtter halden. Sie verboten aůch den
Vetern zů Sant Peter das sie nÿmmer vor die thor solten geen. nach ÿr
můl bestellen. Sie verboten aůch mit gewalt das nÿmants in der Petrer
můl dorfft maln. Dergleichen gewalt ertzaigtn die
vonn Erffůrdt, aůch andern Clostern vnd gaistlichen personen. Welche sie
mit zins. opffer. narůng vnd allem andern beswertn. In hofnůng es solt ÿn
zůgedeÿůng kůmmen. Aber es raicht ÿn zů grossen vnwirden vnd scheden.