Im nechstfolgenden herbst aůff dem tag der enthawbtůng Sant Joannis
des hailigenn tewffers zcog diser Lanntgraff mit seinem heer vor Erffůrdt
vnnd legert sich in das dorff hochheÿm nahendt beÿ die Stat.
Vnnd was er fůr hewser vnnd gerten vor der Stat befandt. die verbrant
vnd verderbt er. Lies aůch die Weingarten Hawenn.
Darnach vber dreÿ wochenn an ainem Freitag. Welcher Sant Mathes
des hailigen Apostel vnd Ewangelistn abendt. desselbenn Iars was.
verbrant der Lanntgraff den Brůel, vnnd was fůr gebew da was.
ander maůrn vnnd in den graben. Vnd aůs gotlicher schickůng
wandt sich der windt. Sůst hett die Stat vnvberwintlichen schaden.
von disem brant entpfangn. Als die von Erffůrdt disen schaden sahen.
besteltn sie die maůrn mit Cristn vnd Iůden Desgleichen die Thurm.
Vnter dem schadenn wůrden die bleÿen rorn aůsgegraben. damit der brůnn auf Sant
Petersberg gelaitet was. Vnd als der Lantgraff sein willen vnd Lust vor
Erffůrdt wol getriben hett. zog er wider ab. vnd lies sein heer zůreÿtn.