Hernach als die vonn Erffůrt ein Newenn Rath setzten. wolt das
gemeÿn Folck dem Rath Inn kaÿn weg schweren nach hůlden. ader
gelobenn. man geredt ÿm dann ein Richtůng mit dem Lantgraůen
zůmachn. Damit sie nach ÿrer narůng wider mochtenn wandern. Vnd nach
nottůrfft freÿ vnnd sicher wider aůff vnnd ab ziehen. Wann sie
hettenn ÿrn acker vnnd ÿr Weingarten etlich zeit nicht megen
erbeitenn. Die Lantgrefische man rantn aůch alle
tag vor sie bis In die thor. Daůonn sie Inn grosser vnsicherhait
warnn. Vnnd ÿr Acker war vmb sie gar wůst worden.
Die dorfferstůnden ledig. Die hantwerckslewth warn des merern
tails aůs der Stat getzogenn. Das gras wůchs zů Erffůrdt vor
den Greten vnd aůff Sant Petersberg. Idermann lebt nach seinem
kopff. Nÿmants wůrd vmb vbertretůng willen des gesetzs vnd Statrechts
gestrafft, Vnnd gieng mit allen sachenn Vnordenlich zů. etc.