in das Lanndt zů Důringn gefůrt. Es stůrbenn aůch zů Erffůrt
mer dann acht tawsent menschenn Hůngers. Das man sie můst auff
karrenn gein Schmidstet fůhrnn. Ann welchem ort vil lewth wiewol
noch lebendt begrabenn wůrdenn. Wann sie kůnten kaÿn
narůng Habenn. vnd verschmachtn daůon. Die andere Stete in důringn.
lieden aůch gros not hůngers Halbenn. Darnach vertarb das getreid
vonn vbermessigen grossenn regen. Da nůn die Lewth keÿn recht brot
kůnten gehabenn. můlen sie knottenn. hasell zapffenn. vnnd eÿcheln.
zůsammenn vnd machten brot daraůs.

Diser Lanntgraff als ein loblicher Fůrst nach vil gedachtm Sÿg wolt
sein anndere feÿndt vngestrafft nicht vnterlassenn. Sundern gebot allem
seinem Folck aůs dreÿen Landen. Meÿssenn. OsterLandt. vnd důringn
aůff, vnnd versammelt sich beÿ dem dorff Tůnged. In maÿnůng mit
solchem heer In Bůchen vber den Apt vonn Fůlda zůzciehenn.