aůch vmb Eysennach. Crewtzbůrg. vnnd annderswo an der Werra sůchtenn.
Weÿl nůn Lanntgraff Fridrich in Důringn kriegt, Nam Marggraff woldemar
Vonn Brandenbůrg vil Stete vnd Sloss. vnd gar schier das gantz Lawsatz
disem Lantgraůen zůgehorig ein. Als er frid in Důringen hett gemacht. wider
Marggraff Woldemar vil tagleistet. vnd vmbdie gnantn Marck kriegt.
Aber Marggraff Woldemar trostet sich seiner gewalt, Vnd als er itzůndt
das Landt zů Lawsatz in gewere hett. widersetzt er sich mit gewalt. Deshalb
ein grosser krieg wart. Als nůn Lanntgraff Fridrich
In Meÿssenn lag. stÿgen des Marggraůen diener zům Haÿn vber die Elbe
beÿ der nacht vber die maůrn. Vnnd mer dann dreÿssig fingn. Welchs die
zům Haÿn yrm Herren dem Lantgraůen baldt zů wissenn theten. Der ser
erfrawet wart, vnd nach seiner gewonhait. aůfsas nÿmants wartendt, Des
morgens gar frwe gegen dem haÿn sich nehet. Also warteten die andern
des Marggraůen diener der gesellen gefangen warn. aůsserhalb der maůrn
vleissiglich. Ab sie ymants mechtenn ergreiffen. důrch den sie ÿr gesellenn
mochten ledig machen. Vnd ergriffen leÿder den Fůrstn diesen Lanntgraůen selbst.
den sie fingn. hinweg fůrtn. vnd dem Marggraff Woldemar antworttn.

Etlich schreibenn das der Lanntgraff hab ein grossenn Rÿt in die
Marck gethan. vnnd gros gůt vonn Vÿhe. pferdenn. vnd Lewthen hinweg
getrÿbenn. Als nůn das der Marggraff Woldemar het
erfarnn. hab er ÿm starck nachgefolget. Also sein sie an eÿnannder
kůmmen. Vnnd habenn mit eÿnander gestritenn. Nachdem
aber des Lanntgraůen Folck hatt zwen tag aneinander gerÿtenn. seÿ
es daůon ser můd wordenn. Vnd hab den streÿt verlornn.
Also seÿ aůch Lantgraff Fridrich gefangen. vnd mit sambt den seinen
gein Brandenbůrg gefůrt wordenn.