Da Lanntgraff Friderich Im gefencknÿs Innen wart das sein Landt seins
abwesens so vilfaltiglichenn gekriegt vnnd verderbt wůrden. gedacht er mit
allem vleis sich zůentledigenn. wie er vermocht. Damit er sich dester ee
vnd besser mocht an seinen feinden rechen. Vnnd aůff das er vnnd
die seinen nicht grossern schadenn entpfingn. Entlich wart er aůff
ein vrfed ledig. Doch also. das er můst fůr sich vnnd die seinen die
mit ÿm gefangen warn. Dreÿssick marck silbers geben. Item
er wart aůch benotigt sich aller gerechtickait zůůerzeihen. fůr sich.
vnd sein erbenn in der gantzen Marck Lawsatz. mitsambt den Slossern
Lantsberg. Eckertsberg. Freÿberg. die sein Vater dem gnanten Marggraff
Woldemar vonn Brandenbůrg verkaufft hett. Aůch můst der Lantgraff
fůr die Dreÿsig tawsent marck verpfenden die Stete vnnd Slosser. Freibůrg
vnd Meÿssenn. Darzů můst der Lanntgraff sein aÿnige tochter Elisabet