dem Graůenn Albrechtenn von Anhalt zů kotenn des Marggraůenn Woldemar
schwester Sůn Vermeheln. Welchs dem Lantgraůen wirsser thet dann
das annder alles. Vnnd die Sůmma mit schaden vnd vncost wart gerechent.
vnd gebracht aůff hůndert tawsent marck silberss. Aůch wart dem
Lantgraff In der Schatzůng eingebůnden seiner tochter etlich
stete vnnd Slosser mit zůgebenn. Als Nemlich Im Osterlandt,
vnd zů Pleÿssen gelegenn. Daraůff schrÿb Lanntgraff
Fridrich seinen Ambtlewthen In pleÿssen vnd Im osterLandt gedachtm
Graůen Albrecht vonn Anhalt sein Stete vnd Slosser vnůor zcůglichen
vmb sein losung zů antwortn. Daraůff die aůs dem Osterlandt
baldt raůmtn. Aber die Inn Pleÿssen antwortenn also. Sie wolten die
Stete vnnd Slosser nÿmants antwortn. sie wůrdenn solchs dann můntlich
von ÿrm Erbherren vnd Landsfůrstn. geheÿssen. Vnnd wen sie sehenn
das er Frisch vnd gesůndt wer. Aber daůor wern sie nicht gesÿnt ÿmants
einzůlassenn.

Als sich nůn die Ambtlewt Inn pleÿssen widersetztn ÿmants ein zůnemen.