Der gleichenn lies diser Lanntgraff sein andere feindt. widerwertige, vnd
beschediger aůch nicht vngestrafft. Sůndern zcog auff sie mit heer vnd
thet ÿn vil schadens. Als nemlich aůff die vonn Můlhawsenn,
Vnd die vonn Northawsenn. Die er nicht weniger dann die von Erffurt,
verhert mit nam vnnd brant sie damit zůvnterweisen hinfůr sich aůff
kein glůck ader vnglůck zůůil zůůerlassen. Vnd derhalben
Inn vnmessig freůel vnnd důrstickait zůfallenn.

Vmb die zeit kam das gerůcht in das Landt zů Důringn wie das der Romisch
kayser Hainrich der Acht In welschenn Landen gestorbenn wer. Daůon dises
Lantgraůen vnglůck gros leichterůng nam. Wann der Lantgraff war
in besorgůng der Romisch kaÿser wůrd ÿn vmb das Landt zů Důringn ansprechn.
Wenn er wider wer zů Landt kúmmen. vnd darůmb mit ÿm. wie die
zwen vorige Romische konige gethan hettenn. kriegen. Aůch múst der
Lanntgraff forchtenn weil dieser gedachter Romischer kaÿser lebet er
wůrd die vil gedachte Stete vnd Slosser zů Pleÿssen die er vmb sein