Důringen mit Ambtlewthenn. Die zeit was ein Edelman mit
Namenn Albrecht knawt, der was Lanntgraff Albrechts rath gewest
Vnnd so mechtig das er mit sambt seinenn freůnden alle sachen Innen
hett. Vnnd das ein gemein sprich wort wass.

Der Lanntgraff ÿm trawt. Das Landt ist der knawt. Dieser
knawt hett sich ann Lantgraff Fridrich geworffenn da sein Vaterr
Albrecht gein Erffůrdt getzogenn was. Vnnd nach dem der
knawt beÿ Lantgraff Albrecht aller sachenn mechtig war gewest.
Vnnd das ganntz Lanndt geregirt hett. wolt er sich voriger gewalt
aůch anmassenn Das wolt ÿm Lantgraff Fridrich nicht gestatenn
Sůndern redt ÿm herticklich ein. Ain mal Sagt knawt vnter andern
freůeln wortenn zů dem Lantgraůen. Wisset herr. Ich hab eůch
darzů gefordert. das ÿr ein Herr Inn ewrm Lanndt wordenn seÿt
Ich findt villeicht aůch ein weg. das ÿr wider daůon kůmmet. ab ich kan.
Daraůff antwort Lantgraff Fridrich zůstůndt. Das wil ich bewarn.
ab ich kan. Vnnd lies ÿn so baldt greÿffenn. vnd ÿm sein kopff abslaenn.
Etlich Cronicka habenn er hab ÿn Inn dem stock lassen sterben. vnd diser
knawt wart in dem prediger Closter zů Eysennach begrabn vnd begangn.
Welchs gescheen ist nach Cristi gebůrt Dreÿzehenhůndert vnd Im zweintzigstn Jhar.

Vmb Eysennach wart nach Cristi gebůrt Dreÿzehenhůndert vnnd Im