Darnach Im nechstn Jhar macht diser Lanntgraff aber mit den Graüen
zů Důringn vnnd mit den Stetenn ein frÿd. den Acker zůbessernn.
Also halff ÿederman seinen armen Lewthenn das der Acker wider gebessert
wart. Wiewol die zeit die Tewrůng so gross war. das vil
Lewth in dorffernn aůff der Strassen vnd an der arbait tot befůnden
wordenn. die vonn hůngers wegenn verschmacht vnd vergangen warnn.

Jm Neůnzehennden Jhar der mindernn zal, bawet diser Lanntgraff
Wartberg wider. vnd lies es an allenn enden befestn vnd bessern. Legt
daraůff ein ser schone vnnd grosse hofstůbenn. vnnd lies erden auf
das Sloss bey den Cisternn treiben. vnd pflantzt ein baůmgarten
daraůff von lůsts wegenn. Lies aůch daraůff aůs Meÿssenn. aůs Pleÿssen
vnd aůs dem Osterlanndt alle sein schetze vnd beste claÿnat fůhrnn. Wann er
vertrawet solchs alles zů Wartberg bas. dann aůff ainem andern Sloss zůbewarn.