Nach Cristi gebůrt Dreÿzehenhůndert vnnd Im ainvnndzweintzigsten Jhar
zcog diser Lantgraff mit sambt seinen Graůen in Důringenn.
vnnd den Steten Erffůrdt Můlhawsen vnnd Northawsen mit einem
grossenn heer vor das Vest vnnd Starck Sloss Raspenberg. Aůff welchem
Sloss vil rawber vnd bóswicht warnn. Die dem Landt zů Důringen
grossen schadenn mit rawben thetenn. Aůch mit mordereÿ vnnd
anderm vbell vnd ÿedermans feÿndt warn. Als nůn die
aůff Raspenberg erfůrnn das der Lanntgraff mit einer solchenn
gewalt kem. getrawetenn sie das Sloss nicht zůerhaltenn. Dann
es war weÿt. vnnd kůnten nicht lÿferůng daraůff vor vil lewth
habenn. Also flogenn sie vonn Raspenberg vnd liessen
es ledig Als nůn der Lanntgraff vor Raspenberg kam fandt
er nÿmants daraůff Darůmb brach er das Sloss zůgrůndt eÿn
Vnnd zog darnach wider Heÿm.