Beÿ disen zeitenn het herr Beringer vonn Schidingen Ritter ein tewr man
das Sloss Eckartsberg Innenn. Vnnd lies sich aůff die Vestickait desselben
vnnd berawbt die Lewth die zwischenn Erffůrdt vnd Naůmbůrg handeltn.
Derhalbenn ÿm diser Lanntgraff zůmermaln schrib. solc [lies: sich] solchs vnzimlichen
fůrnemens zůenthaltenn. Aber er kert sich nichts daran. Sůndern
blÿb in seinem fůrnemen. Derwegen Lantgraff Fridrich nach
Cristi gebůrt Dreÿzehenhůndert vnnd Im Ainvnndzwaintzigstn Jhar mit den
vonn Erffůrdt sich vor Eckartsberg legt Stůrmbt es vnd warff
stets mit bleÿdenn darein. Als er nůn ein weil
vor Eckartsberg gelegenn hett. zog er Inn meÿssen. vnd lies
sein Folck mit den vonn Erffůrt daůor ligen. Da nůn der vonn
Schidingen gewar wůrd das der Lantgraff abgetzogen wer sammelt,
er sich mitsambt seinen freůnden aůffs sterckst so er mocht, vnd zcog eins.