des nachts aůff das heer vnnd slůg vil Lewth in den betten
gezeldenn vnd buden thot.

Vnnd nach dem die vonn Erffůrdt soltenn dieselb nacht die scart
haltenn. Warn ÿr etliche gewapent, vnd kamen zů were.

Jn dem berait sich des Fůrstenn Folck, vnd slůg vnnd fieng des
vonn Schidingen Lewth vnnd freůnde. das er ÿn selber
kaůmet entlieff, vnnd kam aůff das Sloss Eckartsberg.

Vnnd als er vil Lewth aůff dem Sloss hett, gebrach ÿn entlich
speis vnd getrenck, vnnd liedenn vil kůmmers. Da sie solch
vnglůck nicht lenger mochtenn geleiden, redtenn sie mit des Lantgraůen
Ambtlewthen mit erbietůng ÿn das Sloss zůanntwortenn.

Also wart Eckartsberg gewůnnen vnd eingenůmmen. Da
aber Lantgraff Fridrich wider kam. wart er mit grossem
zcornn bewegt. das seins abwesens vnd an sein wissen dass
Sloss war gewůnnenn. Dann der Lanntgraff
het můgen all sein feÿndt Daraůff ergreiffen, vnd straffen
Welche alle vnbeschedigt daůon kamen.