Darnach als nach antzaige der Důringischen Cronickenn der Romisch kaÿser
Otto der Gros sein Sůn. hern Wilhelm zů einem ErtzBischoff zů Meintz
gemacht hett gab er ÿm. vnd dem ErtzBisthůmb zů Meintz gentzlich bede
Landt Důringen vnnd hessen. Welche Landt aůch benanter ErtzBischoff
Wÿlhelm in der zal der Vierzehendt zú Meintz. vnd nach ÿm nach Fůnff
ErtzBischoůe zů Meintz regirten beÿ Sÿbentzig Jarn. Wann
nach ErtzBischoff wilhelm. ErtzBischoff Růprecht. darnach ErtzBischoff
Willigis. darnach ErtzBischoff Erckenbold zůůor Apt zů Fůlda.
Folgendt ErtzBischoff Erbo. Vnd entlich ErtzBischoff Bardo daůor
Apt zů Hirsfeldt. Doch findt man in der grossern Cronicka genciům
das der Romisch kaÿser Otto der Gros an benanten Landen Důringenn
vnd hessen etwas dem hailigen Raich vorbehalten hab. Welchs
eins tails von den Marggraůen am hartz. vnd ains tails von den Graůen
von Wÿntzenbůrg die des ErtzBischoffs vogt warn. besessen ist wordenn.