Diser Graff Lůdwig vonn Vidimont mit dem Bart ist gewest der Erst
Graff in důringen. vnd des ErtzBischoffs vonn Meintz Vogt. vnd ein ser
trefflicher. teůr. vnd streitbar man. vnd dem kaÿser ser angenem.
Derhalbenn ÿn der Romisch kaÿser Cůnradt aůch ser zů ÿm zcog. vnd gar
gewaldig machet an seinem hoff. Da nůn der Romisch kaÿser Cůnradt
in Bůrgůndien zcog. wart ÿm in derselben heerfart diser herr kranck.
Darůmb er ÿn dem ErtzBischoff vonn Meintz Bardo trewlichen beůalh
Welcher nit weniger, gnad. gůnst. vnd lieb dann der Romisch kaÿser zů ÿm
vmb seiner tůgent vnd schicklickait willen trůg. Derhalben aůch diser
ErtzBischoff da er ÿm nichts am Reÿn kůnt geben. belehent er ÿn mit
der Grafschafft zů Důringenn. vnd vil andern gůtern. Derhalben er aůch wirt
der Erst Ludwig genant. Dann es sein mer Graůen vnd Lantgraůen in důringn des namen
gewesen.