legt er ab die kintliche werck, vnnd verfolget die vbelteter in
aigener person vber ser. Er fieng aůch důrch seinen Vogt
Ernn Fridrichenn vonn Wangenheÿm. die Herrenn von Drÿfort vnnd
Spangenbůrg. die das Lanndt berawbtenn, mit zweÿenn Rittern ainem von
Sandernn. vnnd ainem von Hartenberg mit vil andern der er etliche
zů Gotha lies Henckenn. Vnnd etliche sich mit grossem
geldt losentenn.

Die zeit begab sich ein gros aůfflaúf vnd vnaÿnickait zů Erffůrdt
zwischen der Priesterschafft vnnd den Bůrgernn. Vnd man findt zwů
vrsachenn in Cronickenn. Zům erstenn fiengen die vonn Erffůrdt ein
Epistler. vnnd vnangesehen das die Priesterschafft, den vom
Rach begert, dem proůisor als seinem ordenlichenn Richter,
Im mentzischenn hoff zůantwortten, daselbst ÿm wie die zcimůng