Da Invorzeiten die hailig Fůrstÿnn Sannct Elisabet hett die sÿchen ernert.
vnnd ein Spital gehabt. In ansehůng das er aůch da mer raůms. dann
In der Stat wůrd habenn. Also folget der Lantgraff ÿrem Rath.
vnd lies da rewmen. weiter den plan. vnd bawet Sant Elisabet Closterleÿn.
Vnnd leget mit seiner Frawen Mechtÿlden den Ersten steÿn. an der kirchn.
vnd bawet dasselb Closterleÿn von dem holtz das aůff derselbenn hohe
gestanden was. Vnd da Sant Elisabet ÿr sichen hielt. da ist nůn dess
Closterlens kůche. Also setzt der Lantgraff dareÿn Sechs Parfůsserr
Got da tag vnd nacht zůdienen. Die er aůch teglich vonn dem Sloss
speÿset. Weyl aber die herrschafft nicht alletzeit mocht
ÿr hofflagerr zů Wartberg habenn. beschÿet der Lanntgraff den benantn
brudern souil korngůldt. vnd pfenning gůldt, das sich wol vier ader
sechs brůder daůon můgn enthalden. Vnd beqůemlich ernern. Vnnd
an gebrůch yres leibs nottůrfft des Gotlichen dinsts da gewartenn.

Inn demselben Jhar zog diser Lantgraff mit vil gůter Ritterschafft
vnnd eÿnem grossen vnd wolgerůstn Folck In Engellandt zů dem
konig zů Engellandt, wider den konig vonn Franckraich. Da er aůch