mitsambt vil Erbarn lewthen, Ritter wart, Vnd als ÿn die Fůrstn
vnnd herren In dem koniglichen heer wolten zů Ritter slagen. Spracher.
Ich wil hewt vonn nÿmants zů Ritter geslagenn werden. dann der
nÿe geflog. Als sie fragtenn wer der wehr. Da antwort er. Der alt
Fridrich vonn wangenheÿm. Der wart da vor allen Fůrstn. vnnd herren
geheÿscht. vnd slůg seinen aÿgen herren zů Ritter Solche Ere thet diser
Lanntgraff vor allen herren seinem Ernvestn Ritter. herrnn Fridrich
von Wangenheÿm. Vnd darnach am andern tag. lies er sich vnter der messe
zů Ritter gesegenn. Als er nůn ein zeit beÿ dem konig vonn Engellandt
war gewest. bat er gnedig erlawbnÿs wider Heÿm zůziehenn. Vnd
der konig gab ÿm vil hochwirdigs hailthůms. Welchs man nach zů wartberg
vnd In Sant Elisabet Closterlein vnter wartberg hat. Vnd vil Edler
kostlicher klaÿnat die er mit ÿm in das Landt bracht, Es war
aůch nÿmants trefflichs vonn seinen lewthen aůssenblÿbenn.,

Als dieser Lanntgraff glůckseliglich wider heÿm aůs Engellandt, kůmmen
was. machet er seiner Lantschafft aůs allen seinen herschafftn
zů Eÿsennach ein vberschonen Hoff ein ergetzůng vnd frolickait mit ÿn zůhaltn