Diser Lanntgraff wart nach Cristi gebůrt Dreÿzehenhůndert vnd Im
zweÿvnnddreyssigstn Jhar mit seiner můter der alten Lantgrefÿnn
zwÿtrechtig. vmb ÿr mitgab vnnd leibgeding, das ÿr sein Vater bescheÿdn
vnnd gemacht hett. Welchs war Gotha das Sloss vnd die Stat,
vnd weÿssensehe das Sloss vnnd Stat baide mit ÿr zů vnnd eingehorůng
Dann der Lanntgraff Sprach gedachte Stete. werenn der Herrschafft zů
Důringn nůtzer wenn sie beÿ ym bliebenn dann beÿ yr. Darůmb wolt
er Ir annder Slosser, gůter. vnnd renth eingebenn. Solchs wolt sein
můter nicht annemen. vnd beclagt sich diser beswerlichen ansÿnnůng
ÿres Sůns des Lanntgraůen gegen Graůen Bertoldt von hennenberg
den vonn Erffůrdt. vnnd den von Můlhawsenn. dise alle vmb ÿrn