vnnd berawbten die kawfflewt aůff der Raichstrassenn. die vonn
Behem. Poln. vnnd Merern aůff den Marck zů Franckfůrt zogenn
Solchs wart dem Romischen kaÿser geclagt, Darůmb schreib sein kaÿserlich
Maiestat disem Lantgraůenn das er die Graůen vnd Stete zů sich nem vnnd
aůff die Strasrewber zůge. Wie der Lanntgraff aůch thet. Darůmb
můsten die zů Naůmbůrg vnnd Freÿbůrg soůil sie vonn gedachter nam
beÿ Inen hettenn, gantz widerkernn. desgleichenn aůch die anndern an
der Vnstrat vnnd an der Sal, Welche aber nichts mochtn widerkern
die můsten rawmen, vnd daůon fliehen. Denselben lies aůch der
Lantgraff ÿr Slosser Vnnd kemnaten zůbrechenn. Aůch wůrden sie
in des Romischenn kaÿsers acht ertailt.

Lanntgraff Heinrich vonn hessen dises Lantgraůenn Fridrichs vonn
Důringenn Swager hielt mit einem weib zů. Dadůrch er sein eeFrawen
die frůmme Fůrstÿn Lanntgraff Fridrichs swester verachtet, vnnd