ÿe lennger ÿe schmeelicher vnd vnerlicher hielt Solchs treib des
Lanntgraůenvonn hessen brůder Lanntgraff Ludwig mit. Ainmal kam
die Fůrstin allein zům Lanntgraff Lůdwig, Vnd strafft ÿn ser vmb
sein vnzůchtig vnwesen. vnnd beůor das er ÿrn herren seinen brůderr
Lantgraff Heinrich aůch verlaÿt vnd anbrecht, Diss verschmacht
dem Lantgraff Lůdwig so ser das er grossenn hass aůff sie warff, Vnd
bevlÿs sich sie in vngnad ÿres brůder zůbringen Entlich beschůldigt
er die Frůmme Fůrstÿn. er hett sie an dem Ebrůch befůnden mit ÿr
diener ainem. Damit aber Lantgraff Lůdwig fůr kaÿn lůgener wůrd
gehaltenn. gestůndt ÿm des aÿner vonn Talwig Welcher ain
besůnder vngůnst hett zů yrem Sůn dem Jůngn Lantgraůen Otto.
Da solch geschreÿ vnnd gerůcht wider sie aůsbrach. entbot sie das Irer
můter gegenn Gotha. mit vleissiger beclagůng. wie das sie důrch
vngrůndt vnd vnwarheÿt vnd vnůerschůldt wůrd verleůmbt, Vnd von ÿrm
herren aůffs allervnerlichst gehaltenn. Aůch das ÿrm Sůn Lantgraff
Otto zů hessen vil widerwertickait daůon entstůndt Welchs ÿr am
allerschweresten wer. Diss zaigt sie ÿrm Sůn dem Lantgraůen Fridrichn
an. vnd wůrden des mit eÿnander aÿnig Ir tochter vnnd schwesterr
aůs solchem vbell zůentledigenn. Darůmb bestaltn sie ÿr
botschafft gein Cassell, Vnnd als eins tags die Lantgrefÿn von hessenn
mit ÿrnn JůnckFrawen In eÿn kirchen vor der Stat gieng ser frwe
ablaszůerwerben, Also warn des Lanntgraůen zů Důringn Vogte
vorhanden. namen die Fůrstÿnn. Vnd fůrtenn sie mit ÿn gegen Gotha
zů ÿrer můter der Lanntgrefÿn.

Als nůn die Lanntgrefÿn zů hessenn nach Cristi gebůrt Dreÿzehenhundert,
Vnd Im dreÿvnddreisigsten Jhar zů yrer můter gein Gotha kůmmen
was. wart sie mitsambt ÿrem hoffgesinde von yrer můter dieweil sie
lebt erbarlich vnd wol gehaltn. Vnnd nach ÿrer můter thot. zcog
sie zů yrem brůder Lantgraff Fridrich gein Eysennach. Welcher ÿr
sein hoff zwischen Sannt Georgen vnd dem ParFůser Closter gelegen.
eingab. vnd sie mit ÿrem gesÿndt. mit aller gnůcksamkait versah.
Derhalben Lantgraff Hainrich von hessen solchen seiner Frawenn
abziehens ser erschrack, vnnd sich ser schemet, Vnd schrÿb seinem swager
disem Lantgraůen Fridrich von Důringn dem Ernstn. yrm brůder. das er
ym sein weÿb wider wolt schickenn. mit erbietůng ÿr zuuergebenn
alles das sie ym widerwertigs ertzaigt hett.

Daraůff ym diser Lanntgraff enbot, sein swester wer anher vbell
gnůg von ÿm vnnd seinem brůder dem Lanntgraff Lůdwig
vonn hessen gehandelt. Darůmb wůrd sie hinfůr besser vnnd
erlicher beÿ ÿm Irem brůder. vnd beÿ Irer můter sein dann beÿ ÿm.
Darnach verclagt der Lantgraff von hessen sein Swager Lantgraůenn
Fridrich vor dem Romischn kaÿser das er ÿm sein Frawn an sein wissen
Vnnd willenn. heÿmlichenn hett hinweg gefurth.