Lanntgraff Fridrich antwort also. Er hett sein Swester nicht mit
gewalt lassenn holn Sůndern darůmb das sie beÿ ÿrm namen vonseinem
brůder Lanntgraff Ludwig vnnd seinen beÿstendern vnůerschůldt
wer verleůmbt wordenn. Vnnd das sie von dem Lantgraůenn vnerlichn
wer gehalten wordn. Derhalben wolt er sein swesterr
beÿ Im haltenn, solche vnnd andere schmeůng vnd vnleydlich behonůng
zůůermeÿdenn.

Im nechst folgendenn Jar das ist nach Cristi gebůrt Dreÿzehenhůndert
vnd Im viervnnddreissigstn Jhar zcog diser Lantgraff Fridrich Inn
Důringn vor die Stat Neber mit den Graůen vnd seinen Lewthen Im Landt zů
Důringen, Weÿl er vor der Stat lag, geschah ÿm vil schmachait daraůs. Darůmb
lies er Fewr in die Stat werffn, vnd sie gar aůsbrennen. Er gewan aůch das
Slos dabeÿ gelegn mit dem stůrm. vnd die daraůff warn dingtn ÿr leib vnd
lebenn aus.