mit ÿm aůs dem Lanndt zů Meÿssenn vnd dem OsterLandt, zog wider
důrch Erffůrdt vnnd machet eÿn verbůntnÿs mit den von Erffůrdt
wider die benantn Graůenn. Vnd nemlich also. das man alle Slosser
die gewůnnen wůrdenn solten zůbrochen werden. allein aůsgenůmmen
die Slosser die von dem Landt zů Důringn zů lehen reichten. die solt der
Lantgraff mit seinen mannen besetzen. Diss wůrden die von Erffůrdt
fro. vnd der krieg wart angefangn. vnnd weret Vier Jharr.

Jm Erstenn Jhar gewůnnen vnd zůbrachenn die von Erffůrdt kobstet,
Hartislewbenn. Breÿtenherdt, Attirslewben. Witzlewben. kÿrchheÿm.
vnd Westhawsen. Vnd fiengn alle die sie aůff benantn slossern fůnden.

Im andern Jhar zogenn sie vor Fidelhawsenn vnd vor Vippach. vnnd
gewanen, vnnd zůbrachen dieselbenn baÿde aůch. Darnach
gewanenn vnd zůbrachen sie Hesslerr. Von dannen
zogen sie vor Wÿhe. vnd gewanen dieselben Stat vnd Sloss. vnd das
Stetlen verbrantn sie. Darnach gewůnnen vnd zůbrachen
sie Willerstet vnnd Griesheÿm. Darnach zogen sie vor Raspenberg
vnd gewanen vnd zůbrachen es. Also woltenn sie aůch Dornberg
zůbrechen. das wolt der Lantgraff nicht gestaten. Darůmb zogen die
von Erffůrdt von ÿm. Darnach gewůnnen die von Erffůrdt Tůngdorff
allein vnd besatzten es. So gewan der Lantgraff Dornberg allein. vnnd
besatzt es mit seinen lewthen.

Jm drittenn Ihar dieses kriegs belegt diser Lanntgraff mitsambt