Vnnd enbotenn mitsambt der gefangen Ritterschafft vnnd manschafft den
Graůenn vonn Weÿmar. das sie ÿn woltenn aůs dem gefencknÿs helffenn,
Angesehen das sie von ÿrer wegen wern einkůmmen. Da wůrden die graůen
von Weÿmar ser betrůbt, Wann ÿn warn Ir dorffer verderbet. ÿr arme
Lewth berawbt vnnd gefangen. ÿr Slosser gar schier alle abgewůnnenn vnd
zůbrochenn, ÿr manschafft erslagen. vnd die Graůen von Swartzbůrg
gefangen. die sie solten losenn. Hettenn aůch noch stetiglichen krieg
mit dem Lantgraůenn vnd mit den vonn Erffůrdt, vnd besorgtenn
sie wůrdenn daůon zůgrůnt verderben. Derhalbenn liessen
sie den Lantgraůen vmb ein gnedige Sůnůng vnnd Richtůng bittenn
Aber der Lanntgraff wolt ÿn nÿe keÿn antwort gebenn. Sůndern
wolt so langk mit ÿn kriegenn, bis er ÿr Herr. Oder sie sein Herrenn
wůrden. Ab er gleich all sein Lanndt darůber solt verzeren.
Da fiel ÿr freůntschafft dareÿn vnd bat, den Lantgraůen. das er
die Graůen vonn Weÿmar lies fůr sich kůmmen. Also kamen der
Graůen von Weÿmar freůntschafft fůr disen Lantgraůen fieln
ÿm zů fůs, vnnd baten vmb gnad vnd liessenn disem Lantgraůen
alle ÿr Slosser vnnd Stete hůldenn. Důrch Got vmb vergebůng
ÿrer vbeltat bittende. Also nam der Lantgraff die graůen
von Weÿmar zů gnadenn. vnd gab ÿn all ÿr gůther widerr,
an Orlamůnde. Welchs der Lanntgraff ÿm selbst behielt
vnnd machet ÿn die gefangenn loes. Aůch wart die Richtůng
mit dieser bedingůng gemacht. das nach der baÿden Graůenn
vonn Weÿmar tot ÿr Grafschafft solt an den Lantgraůen fallen
erblich zůbesitzenn. Vnd den von Erffůrdt wart
zcÿmmern gegebenn. Welchs alles gescheen
ist Nach Cristi gebůrt Dreÿzehenhůndert, Vnnd Im
ViervndViertzigstenn Jharr.