An mantag nach vnnsers Herren hÿmmelfart Nach Cristi gebůrt dreÿzehen
hůndert vnnd Im FůnffvnndViertzigstn Jhar kam der Graff
vonn Swartzbůrg an etliche mann des Lantgraůenn die In das heer
woltenn reÿtenn. die fing er vnnd fůrt sie aůff Dornberg.

Darnach legt sich diser Lantgraff vor dornberg. Vnd nach dem er Fůnff
wochenn daůor gelegen was. gewan er es entlich vnd zůbrachs. Verbrant
vnd verhert alles das darůmb lag.

Welchs alles Lantgraff Fridrich der Ernst als ein loblicher Fůrst
Sÿghafftiglich vnnd glůcklichenn In ainem Jhar aůsrichtet. Nach
Cristi gebůrt wie oben vermelt ist.