Der Graff vonn hennenberg lies aůch die maůrn zů Crewtzberg heimlich
messen. Inn Hoffnůng dieselb Stat zůerobbern, dess wůrdenn die vonn
Crewtzberg gewarnet, Derhalbenn sie ÿrn Stat grabenn eÿlendt tieffer
grůbenn. vnd ÿr wechter darein besteltn. Als nůn der Graff
vonn hennenberg des nachts kam. vnnd wolt die Stat Ersteigenn
da warnn sein leittern vil zů kůrtz. vnd die wechter meldeten sein
ankůnfft. Also kamenn die Lewth zůr were. vnd warffen der
feÿndt vil zů tot. Welchs mann aůff den negstfolgenden tag an den
zůbrochenn holmen befant. Aber nichts dester weniger fůrt der Graff
sie also tot mit ÿm Heÿm. Vnd nachdem er die Stat nicht kůnt gewÿnnen.
zundt er die vorstat an. vnd fůrt vnd trib mit ÿm heÿm was er da fandt
Also fieng sich an gedachter krieg zwischenn baÿdenn herrenn.