Als diser krieg was angangenn leget Graff Hainrich von hennenberg.
sein Folck gein Scharpfenberg, Welchs alle tag vor Eÿsennach. vor
Gotha, vnnd vor Teneberg was. vnnd dem Lantgraůen vil schadens
thet, Solchs zůůerkůmmen kawfft Lanntgraff Fridrich dem Herrenn vonn
Saltza ab das Sloss Aldensteÿn zwischen Eysennach vnd Breÿtingen gelegen.
Daraůff er sein Folck leget. Das aůch teglich dem Graůen von hennenberg
vor sein Sloss raitt. vnnd ÿm vil schadens thet. Darnach
macht Lanntgraff Fridrich ein grosse heerfart, Vnnd zcog mit seinen
Lanntschafftenn vor Scharpfenberg. vnnd fordert zů ÿm die vonn Erffůrdt
vnd stůrmtn soůil vnnd ser das es anzweiůel gewůnnen wer wordenn,
Wenn es nicht vonn der altenn Lantgrefÿn wer verhindert worden. Die da
sprach. Wenn es gewůnnen wůrd. so wůrdenn es die vonn Erffůrt
zůbrechenn. Angesehenn das es nicht zů der Herrschafft Důringn gehort,
Solchs wůrd ÿm villeicht dar nach leÿdt werdenn.