Jnn mitler zeit versammelt vnnd sterckt sich der Graff von hennenberg
mit den Francken vnnd seinen freůnden. zog vber den walt. vnd vberfiell
des Lantgraůenn heer vor Scharpfenberg. Da geschah ein harter streÿt.
Vnnd wůrdenn vil gúther Lewth erslagen. Der Lantgraff wer aůch
selbst er slagenn worden. wer er nicht als ein gemeÿner krieger geritenn
Vnd an helm schmůck. Welchem vil schůtz von ainem starckenn
Bůrger vonn Eÿsennach gnant Hanns von Freÿmar geschah. der dem
Lantgraůenn nechst dem Almechtigenn sein leben erret. Derhalbenn
ÿm aůch der Lanntgraff darnach vil gnad ertzaigt,

Als graff Heinrich vonn Hennenberg nichts an dem Lantgraůen mit krieg. vnnd
annder vngůt hett gewůnnen. vnd in besorgůng was. er wůrdt solch fůrnemen
an sein sůnderlichen schadenn nicht verfarnn. Aůch zům tail das er
beforcht. wenn der krieg sich in die leng verzcog. so blÿb sein tochter
Inn mitler zeit stets in ainer vorclaÿnůng. Darůmb das sie beÿ
Irem herrenn nicht wer. Derhalbenn wendt er allenn vleis fůr den