Die alle ein heer versammeltn. vnnd vor das benant Slos zogenn.
Darzů die von Můlhawsen vnd Northawsen aůch kamen. Vnnd
gewůnnen das Sloss mit gewalt. Vnd fingen daraůff Graff Herman
von Stolberg. vnd herr Hainrich vonn Witterden Ritter, vnd annderr
Neůnzehen. Also lies der Lantgraff gedachtn Graůen von Stolberg
mitsambt dem Ritter enthawbtenn. vnd die andern alle an Bawm
henckenn. Vnd das Slos zu grůndt brechen. vnd verstorn. Welchs
geschah Nach Cristi gebůrt Dreÿzehenhůndert vnnd Im Sechsvndvirtzigsten Jhar
Bis aůff dise zeit hat gewert der krieg mit den Graůen von weÿmar. von
Schwartzbůrg, vnd von Hennenberg. vnd mit dem Lantgraůenn seinen Landen
vnd Steten, vnd mit den von Erffůrdt vnd wart gentzlich an Sant
Steffans des hailigenn Ersten marterers tag gerichtet, Daůon
gros vnnd gůt Frid wůrd in Dúringn. in Meÿssen. vnd Im Osterlandt.

Jm gedachtenn Jhar nach Cristi gebůrt Dreÿzehenhůndert vnnd Im
SechsvnndViertzigstn. erhůb sich ein zwÿtracht vnter den Herren von
Saltza, der zů der zeit dreÿ brůder warnn. Derselbenn aÿnerr