wolt dem ErtzBischoff vonn Meintz sein tail verkawffen. Das woltn
die andern zwen nicht vorwilligenn Also lang bis der aÿn den andern
vberredt seinen tail aůch dem ErtzBischoff von Meintz zůůerkawffen Da
wider der Eldist brůder was. Sprechendt, wie das er vermittelst
gotlicher gnadenn sein Veterlich erb wolt erhaltenn. Weÿl er aber
solchs seines fůrnemens von ÿn behindert, wůrd, solten sie wissenn,
das er seins bestenn aůch wolt gedenckenn. Also reÿt er zů disem
Lantgraůenn zů Důringn. vnd verkawfft ÿm seinen dritten taill. Da
nůn des Lantgraůenn Ambtman gein Saltza kam. das Slos vnd die Stat
seins tails einzůnemen. Da sprochen die andern zwen brůderr
mitsambt des Bischoffs vonn Meintz Ambtlewten es wer nicht gůt
das man die Stat vnnd Sloss tailte vnd zúriss Mann solt dieselb
beÿeinander lassenn. Vnnd was der Lanntgraff wolt darůmb gebenn.
das solt der Bischoff vonn Meintz aůch thún. vnd solt es allein
behalten. vnd stiessenn den Drittenn Brůder vnd des Lantgraůen
Ambtman aůs Als das der Lanntgraff erfůr versammelt er
zůstůndt all sein Folck. vnnd legt sich mit aller gewalt vor Saltza.
Desgleichen teten aůch die Meintzischenn. vnd traten an die Mawrn vnd
spotteten des Lantgraůenn. Vnnd Sprachen Er wer zů lang
gewest. vnnd zogen ÿr niderhembd gegenn ÿm ab. Vnd entpfingenn yn
mit solcher schmah. Sprechende. Sie mochtenn ÿr kappen gegen ÿm
nicht abziehenn. aůff das sie ÿr har nicht verwůrren. Solche
vnnd andere ÿr schmehůng mocht der Lanntgraff nicht lenger leiden.
vnd hies sein schůtzenn darzů tretenn. die triben sie von der maůrn Aber
sie liessenn nichts dester mer ab von ÿrem geschreÿ vnd spott,
vnnd sprachenn. kunt er nicht mer dann das. So můst er noch lang
daraussen bleÿbenn. Darůmb hies der Lantgraff Fewr einwerffn.
das slugenn sie ym ab. nam er ein armbrost vnd schos zům erstenn
vnnd selbst fewr ein. Da schossenn die andern aůch mit Fewr pfeÿln.
Daůen [lies: Daůon] so vil Fewr aůffgiengn in der Stat Saltza. das sie die Lewth
nit kůnten geleschenn. Wann die Stat mer dann an
zweintzig ader Dreÿssig enden angieng. Also wernn die Lewth
aůs der Stat wol kůmmen. So nit hettenn des Bischoffs von Meintz
Lewth die thor zůgehaldenn. vnnd gewert das Fewer zůschliessenn. Darůmb
mer dann tawsent vnd achthůndert menschen verbrantn. vnnd Vier
zehenn menschen In die Brůnnen fieln. Vnnd In den kellern ersticktenn
an die Jhenige die sich lam ader tot fieln vber die maůrnn.