Als nůn die Stat Saltza aůsgebrant was, sterckt sich der Lanntgraff,
vnnd warff stets mit bleÿden zů dem Sloss. Welchs die Meintzische ÿnnen
hettenn. Er wolt aůch nit ee abzihenn. bis er das gewůnnen hett. Ader mit
der gewalt daůon getriben wurd. Als nůn der Ertz Bischoff
des Lantgraůen Ernst erkant. lies er mit ÿm teÿdingenn. vmb ein Richtůng
Welchs der Lantgraff nicht aůsslůg. Darůmb wart die Richtůng.
also begriffenn. das er die Stat vnnd Slos Saltza solt halb haben. darůmb
setzt er sein Voÿgt dareÿn vnnd zcog ab. Welchs geschah am
Mitwochenn nach vnnser lieben Frawen Wůrtzweÿ ader hÿmmelfart,
Aber darnach behielt es Lantgraff Baltazar allein vor die expens seines brůders.