Darnach gewan diser Lanntgraff Freÿbůrg das der Bischoff von Mersbůrg důrch
seinenn anherrenn verpfendet, Innen hielt, vnnd geschah aůs diser
vrsach. Es begab sich das etlich kaůfflewth aůs poln vnd Slesienn, mit grossem
gůt vnnd kawffmanschatz, pferden. vnnd wagen. důrch Meÿssen. vnnd
OsterLandt zogen. bis in die Stat Naůmbůrg, da sie vber nacht blÿbenn. da
diss der hawbtman vonn Freÿbůrg erfůr. aÿner vonn Heÿme. vnd des
Bischoffs vonn Mersbůrg nahender freůndt versammelt er sein
gesellschafft die des Rawbs gewont warnn. vnd hielt den kawfflewtenn
fůr in dem Lanndt zů Důringen aůff genseÿt der Sala bey dem dorfflen
Gerbstedt an dem Bach Arnewitz genant. da fieng er die bemelte kaůfflewth.